Bakıda Beynəlxalq Olimpiada başladı

Bu gün Heydər Əliyev Mərkəzində 47-ci Beynəlxalq Kimya Olimpiadasının açılış mərasimi keçirilib. 47-ci Beynəlxalq Kimya Olimpiadası iyulun 29-dək davam edəcək. Olimpiada Moskva Dövlət Universitetinin Bakı filialında Moskva Dövlət Universitetinin təşkilatçılığı ilə keçirilir.

ANS PRESS-in məlumatına görə, 47-ci olan Beynəlxalq Kimya Olimpiadası Azərbaycanda ilk dəfədir ki, keçirilir.

Mərasimdə 47-ci Beynəlxalq Kimya Olimpiadasında iştirak edən komandalar təqdim olunub, Kimya Olimpiadasının prezidenti, Moskva Dövlət Universitetinin Bakı filialının rektoru, Azərbaycan Milli Elmlər Akademiyasının müxbir üzvü, professor Nərgiz Paşayeva tədbir iştirakçılarını salamlayıb.

Beynəlxalq Kimya Olimpiadasının yüksək səviyyədə keçirilməsi məqsədilə Təhsil Nazirliyi tərəfindən müvafiq əmr imzalanıb. Olimpiada da 80 ölkədən 300 məktəbli, 250 rəhbər, elmi müşahidəçi və qonaq iştirak edir.

Beynəlxalq Kimya Olimpiadasının qaydalarına görə, hər ölkənin komandasına 2 müəllim və 4 iştirakçı daxildir. Azərbaycandan təmsilçilərin seçilməsi üçün Təşkilat Komitəsi Moskva Dövlət Universitetinin Bakı filialında böyük iş aparıb. İlk olaraq Olimpiadada Azərbaycanı təmsil edəcək milli komandaya namizədlərin seçim qaydaları təsdiqlənib.

Namizədlərin seçimi dörd mərhələdə aparılıb. Seçim turlarında Azərbaycan Respublikasının bütün regionlarından 1660 nəfər (X-XI sinif şagirdləri) iştirak edib. Təmsilçilərin müəyyənləşdirilməsi məqsədilə Moskva Dövlət Universitetinin, ölkəmizdəki ali məktəblərin və Azərbaycan Milli Elmlər Akademiyasının təcrübəli mütəxəssisləri dəvət olunublar.

Olimpiadada iştirak edən Azərbaycan komandası “İstək” liseyinin məzunu Dilqəm Əhmədli, akademik Zərifə Əliyeva adına liseyin builki məzunu Sergey Styopin, “İstək” liseyi və 160 saylı klassik gimnaziyanın 10-cu sinfini başa vuran Hüseyn Babayev və Ruslan Məmmədov daxildirlər. Komandanın rəhbəri isə Qafqaz Universitetində üzvi kimya laboratoriyasının elmi işçisi Mehman Bünyadovdur.

İlk Olimpiada (IChO-1) 1968-ci il 18-21 iyun tarixlərində Çex Respublikasının (əvvəlki Çexoslovakiya) paytaxtı Praqada keçirilib. Elə həmin dövrdən etibarən bu Olimpiada hər il (1971-ci il istisna olmaqla) yeni bir ölkədə təşkil olunur. Müsabiqənin ilk illərində bura əsasən Şərqi Avropanın sosialist ölkələrindən iştirakçılar qatılırdı. Ötən əsrin 80-ci illərindən başlayaraq Olimpiadaya maraq böyüdü və iştirakçıların sayı artmağa başladı. 1998-ci ildə baş tutan Olimpiadada artıq dünyanın bütün qitələrini əhatə edən 47 ölkə təmsilçiləri iştirak edirdilər.