Yasamalda gülsatanı bıçaqlayan şəxsə hökm oxundu

Bakı Ağır Cinayətlər Məhkəməsində Bakı ş. sakini Rauf Abbasovun CM-nin 126.1-ci (qəsdən sağlamlığa ağır zərbə vurma) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.

Oxu.Az xəbər verir ki, bu il aprelin 25-də Yasamal rayonun N.Nərimanov küçəsində Rauf Abbasov şəxsi münasibətlərin aydınlaşdırılması zəminində gül satışı ilə məşğul olan Əjdər Ağadadaşova bıçaqla xəsarət yetirib, zərərçəkən Kliniki Tibbi Mərkəzə çatdırılıb və həyatı xilas edilib.

Həmin tarixdə şübhəli şəxs Yasamal RPİ 26-cı polis bölməsinin əməkdaşları tərəfindən saxlanılıb, barəsində RPİ İstintaq şöbəsində cinayət işi başlanıb. Dindirmə zamanı o, törətdiyi cinayəti etiraf edib və Əjdəri ünvanına söyüş söydüyünə görə vurduğunu bildirib.

Məhkəmə prosesində Rauf Abbasov ittiham üzrə özünü qismən təqsirli hesab edib.

Prosesdə dövlət ittihamçısı çıxış edərək məhkəmədən Rauf Abbasovun 4 il müddətinə azadlıqdan məhrum edilməsini xahiş edib. Təqsirləndirilən şəxsin vəkili isə Abbasovun ilk dəfə cinayət məsuliyyətinə cəlb olunduğunu və zərərçəkən tərəflə barışıq əldə edildiyini qeyd edib. O, müdafiə etdiyi şəxsə şərti cəza verilməsini xahiş edib.

Məhkəmənin hökmü ilə təqsirləndirilən şəxs 3 il müddətinə azadlıqdan məhrumetmə cəzasına məhkum olunub.