Rəsmi Ankaradan Kemerona sərt - CAVAB

Türkiyə Baş nazirinin birinci müavini Numan Kurtulmuş ölkəsinin Avropa İttifaqına 3000-ci ildən tez üzv olmayacağına dair bəyanatları utanverici hesab edir.

Oxu.Az-ın məlumatına görə, müvafiq açıqlamanı N.Kurtulmuş Türkiyə parlamentində çıxışı zamanı edib.

“Əgər kimsə Türkiyənin Aİ-yə 3000-ci ilə qədər üzv ola bilməyəcəyini iddia edirsə, bu Türkiyə üçün yox, belə fikirləri səsləndirən şəxs üçün utanvericidir”, - o deyib.

Məmurun sözlərinə görə, Avropa siyasətçilərinə hazırki Aİ-nin 30 ildən sonrakı taleyi ilə bağlı sual vermək lazımdır.

“Biz viza rejimi ilə bağlı üzərimizə götürdüyümüz öhdəlikləri yerinə yetiririk. Lakin qeyd etmək istəyirəm ki, Türkiyə heç vaxt Avropadan asılı olmayıb və olmayacaq”, - N. Kurtulmuş bəyan edib.