“Cumhuriyet” qəzetinin rəhbəri və köşə yazarı həbs edilib

Türkiyə polisi bazar ertəsi müxalifət “Cumhuriyet” qəzetinin baş redaktoru Murat Sabuncunu həbs edib.

Oxu.Az xəbər verir ki, bu barədə “CNN Turk” məlumat yayıb.

Telekanalın məlumatına görə, hüquq-mühafizəçilər bir neçə qəzetin redaktorlarının evində də axtarışlar aparıb. Polis, həmçinin qəzetin köşə yazarı Güray Ozü də saxlayıb. Saxlanma və axtarış səbəbləri açıqlanmır.

İyulun 16-na keçən gecə Türkiyədə bir qrup qiyamçı dövlət çevrilişinə cəhd edib. Əsas qarşıdurmalar Ankara və İstanbulda olub.

246 türk vətəndaşı həlak olub, 2 minə yaxın şəxs müxtəlif dərəcəli xəsarətlər alıb, qiyam yatırılıb. Türkiyə hakimiyyəti Güləni qiyamın təşkilində ittiham edərək ABŞ-dan onun ekstradisiyasını tələb edib. Gülən özü qiyamı pisləyib və bu qiyama heç bir aidiyyətinin olmadığını söyləyib.