Bakıda sürücü yanan maşını belə tərk etdi – VİDEO

Bakıda avtomobili yanan sürücü vaxtında qəzadan qurtula bilib.

ANS TV-nin məlumatına görə, hadisə Nizami rayonu Heydər Əliyev porspektində, metronun “Koroğlu” stansiyasının yaxınlığında baş verib. Belə ki, “Opel” markalı avtomobil Heydər Əliyev prospekti ilə şəhərin mərkəzi istiqamətində yüksək sürətlə hərəkətdə olarkən sürücü idarəetməni itirib. Nəticədə avtomobil prospektdə əsas və köməkçi yolları ayıran arakəsməyə çırpılıb. Daha sonra avtomobil bir neçə metr sürüşüb və yanmağa başlayıb. Yüngül xəsarət alan sürücü alışan maşını tərk edə bilib.

Hadisə yerinə FHN-nin Dövlət Yanğından Mühafizə Xidmətinin yanğınsöndürmə briqadaları cəlb edilib. Qəzaya uğrayan avtomobil tamamilə yanıb. Yaxınlıqdakı avtomobillər yanğından mühafizə olunub.

Hadisə ilə bağlı Nizami Rayon Polis İdarəsində araşdırma aparılır. İlkin ehtimala görə, yol qəzasına yüksək sürət səbəb olub.