Bərdədə ağır qəza: ölən və yaralananlar var – FOTO

Bərdədə ölümlə nəticələnən ağır yol qəzası baş verib. ANS PRESS-in Qarabağ bürosunun verdiyi məlumata görə, sərxoş sürücünün idarə etdiyi avtomobil dəmir arakəsməyə çırpılıb.

Hadisə Yevlax-Bərdə magistralının Bərdənin Divanlı kəndi ərazisindən keçən hissəsində baş verib. Yüksək sürətlə Bərdə istiqamətində hərəkət edən “NAZ-Lifan” markalı avtomobil dəmir arakəsməyə çırpılıb.

Zərbə nəticəsində avtomobilin təhlükəsizlik yastığı açılsa da içəridə olan 5 nəfərdən 4-ü yaralanıb. Hadisə şahidlərinin köməyi ilə Bərdə MRX-na çatdırılan yaralılardan 83 yaşlı Humay Qurbanovanın həyatını xilas etmək mümkün olmayıb.





Üz nahiyəsindən yaralanan sürücü Qəhrəman Qurbanov vəziyyəti qənaətbəxş olsa da onun 39 yaşlı həyat yoldaşı Həmayə və 1 yaşlı qızı Münəvvər Qurbanovaların vəziyyətləri ağırdır.

Xəstəxanadan verilən məlumata görə, yaralıların hər ikisində kəllə beyin travması və kəllə sümüyünün sınığı qeydə alınıb.

Hadisə yerinə Baş Dövlət Yol Polisi İdarəsinin əməkdaşları gəlib. İlkin ehtimala görə qəzaya sürücünün avtomobili sərxoş vəziyyətdə idarə etməsi səbəb olub. Hazırda baş vermiş faktla bağlı araşdırma aparılır.