“Vergidən yayınma halları qlobal problemdir”

Amerika Birləşmiş Ştatları (ABŞ) prezidenti Barak Obama vergidən yayınma hallarını qlobal problem adlandırıb. Obama Ağ Evdə çıxışı zamanı Konqresi problemin qarşısını almaq üçün tədbirlər görəməyə çağırıb. Obama bildirib ki, vergidən yayınma hallarının əksəriyyəti qanunidir. Lakin, onun sözlərinə görə, problem də məhz bundadır.

Amerikalı iş adamları yüksək vergilərdən yayınmaq üçün öz şirkətlərini daha az vergi tələb edən ölkələrdə qururlar. Bu təcrübə “vergi inversiyası” adlanır.

“Bu cür şirkətlər Amerika şirkəti adını daşımaqla hər cür imtiyazdan istifadə edirlər. Lakin onlar üzərlərinə düşən vergiləri ödəmirlər.” – deyə Obama bildirib.

Amerikanın “Pfizer” (Feyzer) dərman istehsalçısı İrlandiyanın “Allerqan” şirkəti ilə inversiya müqaviləsi bağlayaraq baş qərargahını bu ölkəyə köçürməyi planlaşdırırdı. Beləliklə şirkət 30 deyil, 12.5 faiz vergi ödəyəcəkdi. Şirkətlər arasında bağlanılan müqavilənin həcmi 160 milyard dollardır. Konqresin yeni tədbirlər planı “Pfizer” müqaviləni tərk etməyə vadar edəcək. Amerikanın maliyyə nazirliyindən verilən məlumatla əlaqədar Allerqan şirkətinin səhmləri 16 faiz aşağı düşüb.

Obama maliyyə nazirliyinin tədbirlər planını alqışladığını deyib.