ABŞ-ın Əsədi bombalama hazırlığı: Rusiya qırıcıları “Donald Cook” esminetsini hədələyir – VİDEO

ABŞ hərbi dəniz qüvvələrinin Bəşər Əsəd rejiminə qarşı gözlənilən hərbi əməliyyatlara qatılmaq üçün Suriya sahillərinə göndərilən “USS Donald Cook” esminetsinin Rusiya qırıcıları tərəfindən “hədələnməsi”nə dair videokadrlar yayılıb.

Virtualaz.org xəbər verir ki YouTube-də yerləşdirilən görüntülərə əsasən Rusiya Hava-Kosmik Qüvvələrinin iki qırıcısı Amerikanın 60 “Tomohawk” daşıyan esminetsinin üzərindən uçur. Gəminin heyəti göyərtədə Rusiya qırıcılarının uçuşunu həyacanla izləyir. Məlumatlara görə Rusiya təyyarələri azı dörd dəfə gəminin üzərində uçub.


***12:42

Suriyada Əsəd rejiminin həyata keçirdiyi kimyəvi silah hücumuna hərbi qarşılıq verməkdə israr edən ABŞ-ın Mərkəzi Kəşfiyyat İdarəsi və Pentaqon rejimə aid 22 nöqtənin xəritəsini tərtib edib. Hədəflər arasında İran dəstəkli şiə milis mərkəzləri və içində Rusiya əsgərləri olan Xüms və Tarus hərbi bazaları da var.

Vurulacaq hərbi bazalar mövzusunda Fransa, İngiltərə, ABŞ və İsrailin eyni koordinasiya daxilində hərəkət edəcəyi bildirilir. Suriya rejiminə aid qərargahların bombardmanı dəniz, hava və qurudan raket atəşləri ilə bərabər gerçəkləşdiriləcək.

* * *10:40

ABŞ hərbi donanmasının “Tomohawk” raketləri ilə silahlanmış daha bir hərbi gəmisi Suriya sahillərinə doğru istiqamət alıb.

Virtualaz.org “Wall Street Journal”a istinadən xəbər verir ki, “USS Porter” esminetsi yaxın bir-iki günə Suriya sahillərinə çatmalıdır. Bundan əvvəl ABŞ donanmasının “USS Donald Cook” esminetsinin Kiprdəki bazadan çıxaraq Suriya sahillərinə istiqamət aldığı, Rusiya hərbi bazasının yerləşdiyi Tartusun 100 kilometrliyində manevr etdiyi xəbər verilmişdi.



Xəbər verildiyi kimi aprelin 7-də Dəməşq yaxınlığındakı şərqi Quta qəsəbəsində Əsəd rejiminin kimyəvi silah işlətməsinə cavab olaraq ABŞ Suriya rejimini cəzalandıracağını bəyan edib. Ötən gün açıqlanmışdı ki, prezident Donald Tramp bu məsələdə 48 saat ərzində qərar verəcək. Tramp bəyan edib ki, kimyəvi silah hücumuna görə Əsəd rejimi ilə yanaşı onu dəstəkləyən Rusiya və İran da məsuliyyət daşıyır. Və ABŞ prezidenti ilk dəfə Rusiya prezidentini birbaşa hədəf alaraq Putinin baş verənlərə görə cavab verməli olacağını bildirib.

Hələlik Pentaqon və Dövlət Departamenti Suriya rejiminin kimyəvi silah işlətməsinə cavab olaraq hansı tədbirlərin görüləcəyini şərh etmir. Lakin çoxsaylı mənbələr hərbi variantın masa üzərində olduğunu bildirir. “Reuters” ABŞ hökumətindəki mənbəyə istinadən xəbər veririk, Birləşmiş Ştatlar kimyəvi silah hücumuna cavab olaraq beynəlxalq hərbi cavab tədbirlərini nəzərdən keçirir. Mənbə konkret planı açıqlamayıb, ancaq deyib ki, hədəflər əvvəllər də kimyəvi silah hücumu üçün istifadə edilən obyektlər ola bilər.



“Reuters” ehtimal olunan hədəflər arasında Latakiya əyalətindəki Hmeymim aerodromunun da olduğunu bildirir. Həmin aerodromda Rusiya aviabazası yerləşir. Agentlik xatırladır ki, Ağ ev ötən ay martın 4-də Rusiya bombardmançılarının Hmeymimdən qalxaraq şərqi Qutanı bombaladığını vurğulayıb.

Ekspertlərə görə ABŞ-ın Suriya rejiminə qarşı hərbi əməliyyatlarına Fransa, Böyük Britaniya, Yaxın Şərqin bəzi ölkələri də qatıla bilər.



Ötən gecə BMT Təhlükəsizlik Şurası Suriyada kimyəvi silah tətbiqi ilə bağlı təcili toplantı keçirib. ABŞ-ın BMT-dəki xüsusi nümayəndəsi Nikki Heyli Vaşinqtonun cavab tədbirləri görəcəyini bildirib. Rusiya səfiri Vasili Nebenzya isə bildirib ki, əgər Vaşinqton Suriya hökumət qüvvələrinə zərbə endirsə bunun “ciddi nəticələri” ilə qarşılaşmalı olacaq.



Rusiya şərqi Qutada kimyəvi silah işlədilməsini qəti təkzib edir və bu barədə yayılan məlumatları “uydurma”, foto və video dəlillərini isə “qurama” adlandırır. Hərçənd çoxsaylı mənbələr müxalifətin nəzarətində olan bu qəsəbədə zarin qazının tətbiqi nəticəsində 150-yə qədər adamın öldüyünü, yüzlərlə dinc sakinin ağır vəziyyətdə olduğunu bildirir.