Azərbaycanda yeni gəmilərin tikintisi davam edir – FOTO

“Azərbaycan Xəzər Dəniz Gəmiçiliyi” tərəfindən Bakı Gəmiqayırma Zavoduna sifariş olunmuş 80 nəfərlik 3 ədəd yeni sərnişin gəmisinin tikintisi davam edir.

Bu barədə Oxu.Az-a XDG-dən bildiriblər.

“Hər üç gəminin gövdəsi tam hazırdır, mexanizmlərin və sistemlərin quraşdırılması prosesi gedir. Bu il təhvil verilməsi planlaşdırılan ilk gəmidə yanacaq, yağ və su çənlərinin hidravlik sınaqları uğurla yekunlaşıb, üst tikili əsas göyərtəyə qaynaq olunub, baş mühərriklər də artıq yerinə quraşdırılıb.

Digər iki gəminin gələn il hazır olacağı planlaşdırılır.

Gəmilərin gövdəsi polad, üst tikililəri isə alüminium materialdan hazırlanır. Yüngül materialların tətbiqi, hərəsinin gücü 1895 kVt olan 2 baş mühərrikin qoyulması sərnişin gəmilərinə saatda 40 kilometrə yaxın sürət yığmağa imkan verəcək. Bu, mövcud gəmilərimizlə müqayisədə 2 dəfə çoxdur” - deyə, qurumdan bildirilib.

Azərbaycan Xəzər Dəniz Gəmiçiliyindən bildirilib ki, eyni zamanda, yeni gəmilər 10 tona qədər müxtəlif göyərtə yükü də götürə biləcəklər. Beləliklə, neftçilərin və yüklərin dəniz platformalarına daha tez və daha rahat çatdırılması təmin ediləcək.