Həsən Əliyev: Ermənini bundan əvvəl təmiz qələbə ilə udmuşdum – VİDEO

Döyüşlərim çox çətin keçdi. Əslində qarşılaşdığım rəqiblərin hamısını tanıyırdım. Onlar güclü idmançılardır.

AzNews.info xəbər verir ki, bunu APA TV-yə açıqlamasında Avropa Oyunlarında yunan-Roma güləşi üzrə yarışların bürünc mükafatçısı Həsən Əliyev deyib.

Onun sözlərinə görə, yarımfinalda uduzduğu Ermənistan güləşçisi Miqran Arutyunyanla görüş qabağı ciddi psixoloji gərginlik var idi:

“İlk dəfə keçirilən I Avropa Oyunları, hər kəsin səni izlədiyini bilmək ciddi məsuliyyət idi. Erməni rəqiblə eyni döşəyə çıxmaq həyəcanı birə-beş artırırdı. Nəticə isə gözlədiyimin əksinə oldu. Qələbəyə doğru getdiyim yolda uduzdum. Bu, mənim səhvim idi. Halbuki o idmançını bir neçə il əvvəl təmiz qələbə ilə udmuşdum. Boş yerə xal verdim. İstədim xallarımın sayını artırım, 5 xal yığım ki, sonra 4 xallıq fəndə düşsəm belə, irəlidə olum. Qələbəni tam təmin etmək istəyirdim, amma olmadı”.

Həsən Əliyev ruhdan düşmədiyini və qarşıdan gələn dünya çempionatına ciddi hazırlaşacağını bildirib. Çempionatda birinci olmaq əzmi ilə çalışacağını deyən güləşçi hədəfinin Olimpiada qalibi olmaq olduğunu vurğulayıb.