“Qarabağ” Avropa Liqasında mübarizəni dayandırdı

Futbol üzrə Avropa Liqasının qrup mərhələsinin sonuncu turunun oyunları keçirilib.

Oxu.Az xəbər verir ki, Azərbaycanın “Qarabağ” klubu Tofiq Bəhrəmov adına Respublika stadionunda İtaliyanın “Fiorentina” komandasını qəbul edib və 1:2 hesabı ilə uduzub.

Matçda hesabı 60-cı dəqiqədə Matias Vecino açıb. Qarşılaşmanın 73-cü dəqiqəsində Reynaldo oyunda tarazlığı bərpa edib və yerli azarkeşləri ümidləndirib. Lakin ağdamlıların sevinci cəmi üç dəqiqə çəkib. 76-cı dəqiqədə Federiko Kyeza “Fiorentina”nın qələbə topunu vurub.

J qrupunun digər oyununda Yunanıstanın PAOK klubu Çexiyanın “Slovan” komandasını 2:0 hesabı ilə məğlub edib.

Bu nəticələrdən sonra “Fiorentina” 13, PAOK isə 10 xalla play-off mərhələsinə vəsiqəni təmin edib. “Qarabağ” 7 xalla üçüncü, “Slovan” isə 4 xalla qrupda dördüncü olub.