Kreditini verə bilməyən gənc maskalandı və ... – FOTO

Qusarda ərzaq mağazası qarət olunub. ANS PRESS-in bölgə müxbirinin verdiyi məlumata görə, hadisə Heydər Əliyev prospektində yerləşən “Aydan” marketdə qeydə alınıb.

Bu gecə saat 04:20-də polisə qarət barədə məlumat daxil olub. Qusar rayon polis şöbəsinin istintaq bölməsinin baş müstəntiqi Rəfail Tağıyevin ANS PRESS-in bölgə müxbirinə verdiyi məlumata görə, bir nəfər maskalı şəxs mağazaya girib, pul, siqaret və içki məmulatlarını oğurlayıb çıxarkən yaxalanıb. Onu Quba Regional Mühafizə şöbəsinin Qusar mühafizə bölməsinin əməkdaşları tutub.

Saxlanılan şəxs Rəsulbəyov küçəsi 13 ünvanda yaşayan 23 yaşlı Rəşid Səlimxan oğlu Rəhimxanov olduğu məlum olub.

Polisə verdiyi ifadədə əməlini etiraf edib. Hadisəni içkili olarkən törətdiyini bildirib. Qeyd edib ki, mazanın qapısını mismar çıxaran linglə açıb.

Saxlanılan şəxs ANS PRESS-in bölgə müxbirini bildirib ki, banklardan birinə kredit borcu olub. Ödəyə bilmədiyi üçün bu addımı atıb.

Faktla bağlı rayon polis şöbəsində cinayət işi başlanıb, araşdırma aparılır.