Azərbaycanlı ailə soyuq havada dənizdə çimir – VİDEO

Soyuq su immuniteti gücləndirir və uşaqlar heç vaxt iynə, dərman görmürlər.

Soyuq havada dənizdə çimmək İsgəndərovlar ailəsinin ən sevimli məşğuliyyətidir.

Oxu.Az ARB Şimal TV-yə istinadən xəbər verir ki, Xaçmazın Üçgün kəndində yaşayan bu ailənin üzvləri dənizə, əsasən, payız və qış aylarında gedirlər.

55 yaşlı Süleyman İsgəndərov 3 azyaşlı övladını körpəlikdən soyuq suda çimməyə vərdiş edib.

Ailənin böyük oğlu İsgəndərin 11 yaşı var. Güləş və kikboksla məşğul olan azyaşlı çıxış etdiyi yarışlarda dəfələrlə birinci yeri qazanıb. İsgəndər qış aylarında məşqlərini imkan olduğu qədər dəniz kənarında edir. İsgəndərin qardaşı Qədir və bacısı Dəniz də ondan geri qalmırlar.

Uşaqların atası Süleyman İsgəndərov özü də 40 ilə yaxındır güləşlə məşğul olur. O, qışda dənizə girməyin uşaqlarda immuniteti gücləndirdiyini deyir.

“Anadan olan ilk günlərdən onlara soyuq suda çimməyi öyrətmişəm ki, sağlam olsunlar. Soyuq su immuniteti gücləndirir və uşaqlar heç vaxt iynə, dərman görmürlər”.

Süleyman İsgəndərov soyuq havada dənizdə çimməyi hamıya tövsiyə etmir. Bunun üçün mütəmadi məşq edib, soyuq suya vərdiş olmaq lazımdır. Əks halda, bu xəstəliklə nəticələnə bilər.