YAP-çı deputatdan TƏLƏB — “Meydan TV” və “Sancaq” bağlanılsın

“Mən izləyirəm, “Meydan TV” və “Sancaq” sosial səhifəsində dövlət rəhbərinə qarşı cəfəng məlumatlar yayımlanır. Bu səhifələr bağlanılsa, daha yaxşı olar”.

Ölkə.Az saytının məlumatına görə, bu fikirləri Milli Məclisin bu gün keçirilən plenar iclasında çıxışı zamanı Yeni Azərbaycan partiyasından seçilmiş deputat Məlahət İbrahimqızı bildirib.

İnternet üzərindən yayımlanan bir sıra televiziyaların fəaliyyəti ilə bağlı sərt çıxış edən M.İbrahimqızı deyib ki, adam bu cür yazıları utandığından oxumaq istəmir:

“Bizi kimsə mətbuatda tənqid etsə də, az qalırıq ki, o saat məhkəmələrə müraciət edək. Mən o yazıların hamısını “screen shot” etmişəm. İndi internet televiziyaları ilə bağlı qərar qəbul edə bilmirlər. Çünki qanunda bu məsələlərlə bağlı boşluq var. Payız sessiyasının gündəliyinə internet üzərindən yayımlanan televiziyaların tənzimlənməsi ilə bağlı qanun layihəsinin salınmasını təklif edirəm. Dünyanın heç bir yerində internet üzərindən dövlət başçısını belə təhqir etmirlər”.