NASA Marsın ən böyük sirrini açdı – FOTO

NASA Marsın ən böyük sirrinin açıb. Qırmızı planetdə — mövsümi yaranan və maye halında olan duzlu su axınları — çaylar aşkar edilib.

Oxu.Az xəbər verir ki, bu barədə NASA-nın xüsusi təşkil edilmiş mətbuat konfransında bildirilib. Tədbir NASA Television-da və agentliyin saytında canlı yayımlanıb, tədqiqatın əsas nəticələri isə Nature Geoscience nəşrində dərc edilib.

Tədqiqatın nəticəsinə əsasən, Marsda mövsümi yaranan və maye halında olan duzlu su axınları var. Bu axınlar ilin isti aylarında əmələ gəlir, soyuq aylarda isə yoxa çıxır.

Alimlər belə qənaətə Mars Reconnaissance Orbiter (MRO) apparatının High Resolution Imaging Science Experiment (HiRISE) aləti vasitəsi ilə əldə etdikləri yüksək keyfiyyətli şəkilləri təhlil etdikdən sonra gəliblər.

Tədbirdə Cim Qrin (NASA-nın baş planetoloqu), Maykl Meyer (NASA-da Marsın əsas tədqiqatçısı), Meri Bet Vilqelm (Kaliforniyanın Eyms Tədqiqat mərkəzinin və Corciya Texnoloji institutunun alimi), Luxendra Oyxa (Corciya Texnoloji institutunun alimi) və Alfred Makyun (Arizona universitetinin HiRISE elmi aləti üzrə baş mütəxəssisi) kimi alimlər iştirak ediblər.