Sınaq uçuşu zamanı Su-27SM qırıcısının quyruğu qopdu

Rusiyada sınaq üçüşü keçirilən zaman yeni istehsal olunmuş Su-27SM qırıcı təyyarəsinin quyruq hissəsi qopub. Virtualaz.org “Mash” telegram-kanalına istinadən xəbər verir ki, hadisə 2017-ci ilin dekabrında baş versə də, bu barədə yalnız indi bildirilib.

Hadisə uçuş sınaqlarında baş verib. Təyyarəni təcrübəli pilot Kitayev idarə edib. Qeyd olunur ki, pilotun qarşısına hərbi maşını maksimal sürətə çatdırmaq vəzifəsi qoyulubmuş. Lakin təyyarə maksimal sürətə yaxınlaşan vaxt pilot möhkəm gurultu səsi eşidib və təyyarənin korpusu sürətlə irəli atılıb.

Arxa görüntü güzgüsündən təyyarəçi müşahidə edib ki, qırıcının sol tərəfdə quyruq hissəsi qopub. Buna baxmayaraq, o, hava gəmisini yerə endirə bilib.

Artıq yerdə baş verənlərin səbəbləri araşdırılarkən məlum olub ki, təyyarə düzəldilən zaman düzgün boltlardan istifadə olunmayıb, ikincisi isə, boltlar möhkəm bağlanmayıbmış. Buna görə də, təyyarənin bir hissəsi güclü təzyiqə davam gətirməyib.