Donetskdə iki məktəbli öldürüldü

Ukraynanın Donetsk şəhərində iki məktəbli öldürülüb. ANS PRESS-in məlumatına görə, məktəblilər üsyançıların hava limanına hücum zamanı atışmasının qurbanı olublar. Atışma zamanı artilleriya mərmisi məktəbin ərazisinə düşüb. Mərmi meydançaya düşdükdən sonra partlayıb.

Nəticədə məktəbin həyətində futbol oynayan iki yeniyetmə ölüb və 4 nəfər xəsarət alıb. Xəsarət alan yeniyetmələr xəstəxananın reanimasiya şöbəsinə yerləşdiriliblər.

Donetskdə çərşənbə axşamından bəri davam edən qarşılıqlı həmlələrdə ən azı bir adamın öldüyü və bir neçə nəfərin yaralandığı xəbər verilir.

Qeyd edək ki, sentyabrın 5-də əldə olunmuş atəşkəs razılaşmasından sonra yüzlərlə adam öldürülüb. Ötən ay strateji əhəmiyyətə malik Donetsk aeroportuna nəzarət uğrunda üsyançılarla Ukrayna qüvvələri arasında şiddətli döyüşlər aparılıb.

ATƏT təşkilatının müşahidə missiyası atəşkəs rejiminin hər iki tərəfdən pozulması hallarının davam etdirildiyini bildirir.