Şaxtaxtinski Əliyevlə şəkil çəkdirdiyinə görə işdən çıxarıldı? – RƏSMİ

Səfir Aleksis Şaxtaxtinski mayın 31-də müqaviləsi bitdiyi üçün vəzifədən gedib.

AzNews.info xəbər verir ki, bu barədə ATƏT-in mətbuat xidmətindən APA-nın sorğusuna cavab olaraq bildirilib.

“Bu prosesin ATƏT-in layihə-koordinatorluğu ofisinin mandatı ilə heç bir əlaqəsi yoxdur”,- deyə məlumatda qeyd edilir.

Qeyd edək ki, Azərbaycan Respublikası Prezidenti Administrasiyası rəhbərinin müavini, Xarici əlaqələr şöbəsinin müdiri Novruz Məmmədov özünün "Twitter" səhifəsində ATƏT-in Azərbaycandakı nümayəndəsi Aleksis Şahtaxtinskinin fəaliyyət mandatının dayanması barədə məlumat aldığını yazıb. Onun sözlərinə görə, diplomatik dairələrdə bunun əsas səbəbini ABŞ-ın ATƏT-dəki səfirinin mövqeyi ilə izah edirlər: “ABŞ-ın ATƏT-dəki səfiri D. Bayer A. Şahtaxtinskiyə irad tutub ki, sən niyə ölkənin başçısı ilə şəkil çəkdirmisən? Belə çıxır ki, A. Şahtaxtinski səfir Bayerlə şəkil çəkdirsəydi, onun gələcək karyerası çox uğurlu olardı”.

Xatırladaq ki, ATƏT-in Daimi Şurasının 26 iyul 2013-cü il tarixli qərarına əsasən 1 yanvar 2014-cü il tarixindən etibarən ATƏT-in Bakı Ofisi ATƏT-in Bakı Layihə Əlaqələndiricisi statusuna transformasiya olunub.