Nazir: Bütün sursat ehtiyacımızı yerli istehsal hesabına qarşılayacağıq

Azərbaycan Müdafiə Sənayesi Nazirliyi bu ildən Silahlı Qüvvələrin bütün sursat ehtiyaclarını yerli istehsal hesabına tam qarşılayacaq.

AzNews.info xəbər verir ki, bunu APA-ya açıqlamasında müdafiə sənayesi naziri Yavər Camalov bildirib.

Nazirin sözlərinə görə, yaxın aylarda Azərbaycanda tank və artilleriya mərmilərinin istehsalını həyata keçirəcək zavodun açılışı planlaşdırılır. Eyni zamanda bu il ərzində 30 mm çaplı mərmilərin, RPQ-7 qumbaraatanları üçün 4 növ döyüş sursatının istehsalına start veriləcək.

“Bununla da atıcı silahlar və artilleriya silahları üçün döyüş sursatlarına olan tələb tam qarşılanacaq. Bu istiqamətdə xaricdən asılılıq minimuma endiriləcək”, - deyə Y. Camalov vurğulayıb.

Müdafiə sənayesi naziri artıq Azərbaycanın istehsal etdiyi döyüş sursatlarına xarici ölkələrdən tələbatın olduğunu da bildirib.