Estoniya hökuməti rus dilində təhsilə icazə verdi

Estoniyada Taavi Rıyvasın hökumətinə parlament tərəfindən etimadsızlıq göstərilməsindən sonra formalaşdırılan yeni koalisiyaya daxil olan Mərkəzçi Partiyanın sədr müavini Mixail Kılvart bildirib ki, yeni hökumət gimnaziyalarda rus dilində tədrisə icazə verəcək.

“Eston dilini əksər fənlərin rus dilində tədris olunduğu halda da uğurla öyrənmək mümkündür. Biz koalisiya üzrə partnyorlarımızı inandırmağı bacardıq ki, məktəblərdə bu cür şərait yaradılmalıdır. Beləliklə, bundan sonra Narva və Tallin şəhərlərinin gimnaziyaları müraciət edərək, rus dilində tədrisə keçə bilərlər” – virtualaz.org “RİA Novosti”yə istinadən xəbər verir ki, bunu Kılvart “Postimees” nəşrinə müsahibəsində deyib.

Qeyd edək ki, Estoniyanın müsahibədə adı çəkilən şəhərlərində xeyli sayda rusdilli əhali yaşayır.