FTX: Rusiya təyyarəsi partladılıb

A321 sərnişin təyyarəsinin göyərtəsində uçuş zamanı gücü trotil ekvivalenti ilə 1 kq təşkil edən əldəqayırma partlayıcı qurğu işə düşüb, bu barədə Federal Təhlükəsizlik Xidmətinin rəhbəri Aleksandr Bortnikov bəyan edib, Oxu.Az xəbər verir.

“Mütəxəssislərimizin qiymətləndirməsinə görə, təyyarənin göyərtəsində uçuş zamanı trotil ekvivalentində 1 kq gücü olan partlayıcı qurğu işə düşüb, nəticədə təyyarənin havada parçalanması baş verib. Bu, təyyarənin hissələrinin uzaq məsafələrə düşməsini izah edir”, - o, bu barədə Rusiya təyyarəsinin Sinay yarımadasında qəzaya uğramasının səbəblərinin istintaqına həsr edilmiş iclasda bildirib.

Qeyd edək ki, oktyabr ayının 31-də Şarm-əl-Şeyxdən Sankt-Peterburqa uçan “Koqalımavia” şirkətinə məxsus Airbus A321 sərnişin təyyarəsi Misirdə Sinay yarımadasında qəzaya uğrayıb. Təyyarənin göyərtəsində olan 224 nəfərin hamısı həlak olub.