Bakı sakinləri Rusiya səfirliyinə gül aparır – FOTO

Bakı sakinləri Rusiyanın sərnişin təyyarəsinin Misirdə qəzaya uğraması nəticəsində ölənlərin xatirəsini yad etmək məqsədilə Rusiyanın Azərbaycandakı səfirliyinə gül dəstələri gətirirlər.

AzNews.info Trend-ə istinadən xəbər verir ki, səfirliyin fasadı yanında gül dəstələri, başsağlığı yazıları qoyulub. İnsanlar diplomatik missiyanın binasının yanına çıraqlar qoyurlar.

Bu aksiyanı işıqlandıran “RİA Novosti” agentliyi qeyd edir ki, yağışa və güclü küləyə baxmayaraq bakılılar səfirliyin konsulluq şöbəsinin binasının önünə toplaşıb, ora gül dəstələri qoyub, şam yandırıblar. Qəzada 25 uşağın həlak olmasına işarə olaraq səfirliyin qarşısına xeyli oyuncaq da gətirilib. Aksiyada Bakıya parlament seçkilərini izləməyə gəlmiş rusiyalı jurnalistlər də iştirak edib.

Qeyd edək ki, oktyabrın 31-də Şarm əl-Şeyxdən Sankt-Peterburqa uçan "Airbus-321" təyyarəsinin Sinada qəzaya uğraması nəticəsində göyərtədə olan 217 sərnişin və 7 ekipaj üzvü həlak olub.