Nazir müavini: Azərbaycan “Putin İttifaqında” iştirak edə bilər

“İştirakın ətraflı qiymətləndirməsini aparmaq lazımdır”.

Azərbaycan Avrasiya İqtisadi İttifaqına daxil olmaq imkanını istisna etmir, lakin bundan öncə bu birlikdə iştirakın bütün mənfi və müsbət tərəflərini təhlil etmək lazımdır, bu barədə Azərbaycan iqtisadiyyat və sənayə nazirinin müavini Sevinc Həsənova bəyan edib, Oxu.Az RİA Novosti-yə istinadən xəbər verir.

“Biz Azərbaycana fayda gətirəcək ittifaqlarda iştirak edə bilərik. Bunun üçün belə təşkilatlarda iştirakın bütün mənfi və müsbət tərəflərini təhlil etmək, ətraflı qiymətləndirmə aparmaq lazımdır”, - deyə, nazir müavini jurnalistlərə bəyan edib.

Avrasiya İqtisadi İttifaqı Beynəlxalq Gömrük İttifaqı və Vahid iqtisadi məkan bazasında yaradılan və cari ilin yanvar ayının 1-dən fəaliyyət göstərən beynəlxalq inteqrasiya iqtisadi birliyidir.

Hal-hazırda Avrasiya İqtisadi İttifaqının üzvləri Rusiya, Ermənistan, Belarus, Qazaxıstan və Qırğızıstandır.