Türkiyə parlamentinin fövqəladə iclasında qərar verildi – VİDEO

Türkiyəli deputatlar Böyük Millət Məclisinin fövqəladə iclasına toplanaraq Suruçda baş vermiş qanlı terror aktı və Türkiyə ordusunun İŞİD və PKK-ya qarşı əməliyyatlarını müzakirə edib.

ANS PRESS-in məlumatına görə, parlamentin sessiyası yerli vaxtla 15:00-da başlayıb. Diskussiyalarda deputatlar Suruçda 32 nəfərin həyatına son qoymuş partlayışın motivləri barədə danışıb.



Müxalifət partiyaları PKK və İŞİD tərəfindən həyata keçirildiyi iddia edilən terror insidentlərinin araşdırılması ilə bağlı xüsusi komissiyanın yaradılmasına dair vəsatət qaldırsa da, bu təklif qəbul olunmayıb.

Çıxış edən baş nazir müavini Bülənt Arınç bildirib ki, anti-terror əməliyyatları çərçivəsində iyulun 24-dən bəri saxlanılan 1061 şübhəlidən 545 nəfərin işi məhkəmələrə göndərilib, 31 nəfər barəsində İŞİD-lə əlaqələrin olması ittihamı ilə cinayət işi açılıb.

Şübhəlilələrdən 156 nəfəri sərbəst buraxılıb. Türkiyəli deputatlar hazırda yay tətilində olsalar da CHP-li 110 millət vəkilinin ünvanladığı petisiyadan sonra ölkədə yaşanan gərginliklə bağlı fövqəladə iclasın keçirilməsinə qərar verilib.

Bu arada Türkiyə Baş Nazirliyi Türkiyə sərhədlərində və Şimali İraqda İŞİD, PKK və DHKP-C terror təşkilatlarına qarşı keçirilən son əməliyyatlar barədə məlumat yayıb.

Məlumata görə, iyulun 28 və 29-da Türkiyə Hərbi Hava Qüvvələri şəhid olmuş mayor Arslan Kulaksızın adına olan əməliyyat nəticəsində Şimali İraqda PKK-ya məxsus Zap, Hakürk, Qəndil və digər düşərgələri məhv edib.

PKK, İŞİD və DHKPC-lə bağlı ölkə daxilində aparılan reydlər nəticəsində saxlanılan şübhəlilərin sayı 1309 nəfəri ötüb.

Son məlumatlara görə, Türkiyədə PKK terrorçularının hücumu nəticəsində daha bir hərbçi şəhid olub. Ağrı vilayətinin Doğubayazıt rayonunda terrorçular hərbçilərin maşınlarına raketlərlə hücum ediblər.

Türkiyə Silahlı Qüvvələri Baş Qərargahının yaydığı açıqlamada bildirilir ki, terrorçular Doğubayazıt-Gürbulak magistral yolunda hərbçilərin olduğu zirehli avtomobili raketlərlə atəşə tutublar.

Hücum nəticəsində 1 hərbçi şəhid olub, 3 nəfər isə ağır yaralanıb.