Səlim Müslümov işsizlikdən sığorta sisteminin qurulmasını istəyir

Əmək və Əhalinin Sosial Müdafiəsi naziri Səlim Müslümov Prezident İlham Əliyevə gənclərin məşğulluğunun artırılması məqsədilə Azərbaycanda işsizlikdən sığorta sisteminin qurulması barəsində təklif verib.

Oxu.Az xəbər verir ki, belə bir təkliflə nazir Nazirlər Kabinetinin dünənki iclasında çıxış edib.

Nazirin sözlərinə görə, bu gün Azərbaycan gənclər arasında aşağı işsizlik həddi olan dövlətlərdən biridir:

"Ölkəmizdə 15-24 yaş arasındakı gənclər üzrə işsizlik səviyyəsi 13,5% olduğu halda, Avropa İttifaqında bu, 20,6%-dir.

Təsadüfi deyildir ki, Azərbaycan dünya miqyasında gənclərin məşğulluğu üzrə BMT-nin elan etdiyi on lider ölkə sırasına, habelə cari ildə Beynəlxalq Əmək Təşkilatının rəsmi saytında gənclərin səmərəli məşğulluğunun təmin olunması sahəsində dolğun hüquqi bazası, praktik iş təcrübəsi olan 41 ölkə sırasına daxil edilib”.

“Bununla belə, gənclərin məşğulluğunun artırılması üzrə xüsusi layihələrin hazırlanması,eləcə də onlara əmək bazarının tələblərinə uyğun çevik peşə təhsili imkanlarının yaradılması üçün aktiv məşğulluq tədbirlərinin artırılması zəruridir” - deyə, nazir əlavə edib.