Vahid Ələkbərov “Şahdəniz”ə görə Qərbdən 1 milyard borc ala bilmədi, Qara dəniz bankına üz tutdu

Virtualaz.org saytı xəbər verir ki, bu barədə bankın rəsmi saytında bildirilir.

Açıqlamaya əsasən bank “LUKoil”un törəmə şirkəti “LUKoil Overseas Shahdeniz Ltd” şirkətinə “Faza-2” müqaviləsi çərçivəsində “Şahdəniz” yatağının işlənməsi layihəsindəki işlərin maliyyələşdirilməsi üçün kredit ayırmaq imkanlarını nəzərdən keçirir. Bank şirkətin nə qədər kredit almaq üçün müraciət etdiyini açıqlamır.

“Banka təqdim edilən layihə iki dəniz platformasının tikintisi, Səngəçal terminalının genişləndirilməsi və Cənub-Qafqaz boru kəməri magistralının Bakı-Gürcüstan-Türkiyə sərhədi hissəsinin tikintisini nəzərdə tutur”- deyə açıqlamada bildirilir.

“Şahdəniz-II” layihəsinə 28 milyard dollara yaxın investisiya qoyuluşu planlaşdırılıb.

Xatırladaq ki, “LUKoil” Azərbaycanın “Şahdəniz” yatağında 10 faizlik paya malikdir. Rusiya şirkəti layihədəki payını idarə etmək üçün “LUKoil Overseas Shahdeniz Ltd” törəmə şirkətini yaradıb. Müqaviləyə əsasən “Şahdəniz-II” layihəsinə dair investisiyanın 10 faizini Vahid Ələkbərovun şirkəti yatırmalıdır.

Lakin azərbaycanlı neft maqnatı bu işləri maliyyələşdirmək üçün çoxdandır kredit mənbələri axtarsa da çətinliklərlə üzləşib.

“LUKoil” şirkəti hələ Ukrayna ətrafında böhran dərinləşməzdən əvvəl Avropa Yenidənqurma və İnkişaf Bankından “Şahdəniz” üçün kredit istəmişdi. O vaxt bank açıqlamışdı ki, “LUKoil” yataqdakı payını maliyyələşdirmək üçün 1 milyard dollar kredit istəyir.

Lakin bank kredit məsələsinə baxılmasını bir neçə dəfə təxirə saldı. Və indi belə görünür ki, Vahid Ələkbərov Avropa Bankından əl üzərək Qara dəniz regional bankına üz tutub. Ehtimal ki, Avropa bankı Ukrayna məsələsinə görə Rusiya ilə Qərb arasında münasibətlərin gərginləşməsinə görə “LUKoil”a kredit verməyib. Habelə “LUKoil” Qərbin Rusiyaya qarşı bəzi sanksiyalarının təsiri altına düşür.

Qara dəniz Ticarət və İnkişaf Bankı 1997-ci ildə Qara dəniz hövzəsi ölkələrinin iqtisadiyyatının inkişafına dəstək vermək və regional əməkdaşlığı möhkəmləndirmək üçün yaradılıb. Onun təsisçiləri 11 ölkə - Rusiya, Yunanıstan, Türkiyə, Bolqarıstan, Ukrayna, Rumıniya, Albaniya, Azərbaycan, Ermənistan, Gürcüstan və Moldovadır. Azərbaycanın bankın səhm kapitalında payı 5 faiz təşkil edir.