Bakıda biznes forum keçirilib

Bakı Biznes Mərkəzində Rusiya Federasiyasının Tatarıstan Respublikasının prezidenti Rüstəm Minnixanovun Azərbaycana səfəri çərçivəsində İqtisadiyyat və Sənaye Nazirliyinin təşkilatçılığı ilə Azərbaycan-Rusiya biznes forumu keçirilib.

İqtisadiyyat və Sənaye Nazirliyinin mətbuat xidmətindən ANS PRESS-ə daxil olan məlumata görə, tədbirdə Azərbaycan və Tatarıstan tərəfindən rəsmi şəxslərlə yanaşı, iqtisadiyyatın müxtəlif sahələrində fəaliyyət göstərən 50-ə yaxın iş adamı iştirak edib.

Biznes forumu açan iqtisadiyyat və sənaye naziri Şahin Mustafayev yüksək tərəfdaşlıq səviyyəsində olan Azərbaycan-Rusiya əlaqələrinin uğurla inkişaf etdiyini, bu əməkdaşlığın Rusiya Federasiyasının federal subyektləri ilə də həyata keçirildiyini vurğulayıbr. Bildirilib ki, Azərbaycan ortaq din, mədəniyyət və ənənələrə malik Tatarıstan Respublikası ilə müxtəlif sahələrdə uğurla əməkdaşlıq edir. Tatarıstan nümayəndə heyətinin Azərbaycana bu səfəri də əməkdaşlığın inkişafına, iqtisadi əlaqələrin daha genişlənməsinə öz töhfəsini verəcək. Sabah Gəncə avtomobil zavodunda “KamAZ” markalı yük maşınlarının yığılması üzrə konveyerin istifadəyə verilməsi Azərbaycan və RF Tatarıstan Respublikası arasında əlaqələrin uğurlu inkişafının daha bir göstəricisidir.

Azərbaycan iqtisadiyyatı barədə məlumat verən Ş.Mustafayev neft maşınqayırması, neft kimyası, dərman istehsalı, İKT, turizm, o cümlədən tibb turizmi və s. sahələrdə geniş əməkdaşlıq imkanlarının olduğunu diqqətə çatdırıb.

Tatarıstanın baş nazirinin müavini, sənaye və ticarət naziri Ravil Zaripov Rusiyanın digər subyektləri kimi, Tatarıstanın da Azərbaycanla əlaqələrin genişləndirilməsində maraqlı olduğunu vurğulayıb, ölkəmizdəki iqtisadi inkişafın əməkdaşlığın dərinləşdirilməsi üçün böyük imkanlar yaratdığını ifadə edib. R.Zaripov Tatarıstan Respublikası iqtisadiyyatı barədə məlumat verərək, Tatarıstanın Rusiya Federasiyasının sürətlə inkişaf edən bölgələrindən olduğunu, bu gün keçirilən biznes forumun iş adamları arasında əlaqələrin genişləndirilməsində və yeni əməkdaşlığın qurulmasında əhəmiyyətli olacağını deyib, Azərbaycan iş adamlarını Tatarıstana dəvət edib.

Tədbirdə Azərbaycan və Tatarıstan şirkətlərinin fəaliyyətləri barədə məlumat verilib, Azərbaycan və Tatarıstan Respublikası arasında əməkdaşlığın inkişafı istiqamətləri müzakirə edilib.