AST Telmanın borcu açıqlandı

Dünyanın ən dəbdəbəli otellərindən birinin sahibi, Azərbaycanlı iş adamı Telman İsmayılovun (AST Telman) borcunun məbləği açıqlanıb.

ANS PRESS-in "Milliyət"ə istinadla verdiyi məlumata görə, 1,5 milyard dollara Türkiyənin Antalya şəhərində "Mardan Palace" otelini inşa etdirib, açılışına dünya ulduzlarını toplayan iş adamının ipotekalarla birlikdə ümumilikdə borcu 584 milyon lira (230 milyon dollara yaxın) civarındadır.

Onun sahibi olduğu möhtəşəm otel 2009-cu ildə fəaliyyətə başlayıb. 2010-cu ildə isə "Turizmin Oscarları" adlandırılan "World Travel Awards 2010"da dünyanın ən lüks oteli seçilən "Mardan Palace" 4-cü İcra Dairəsi tərəfindən satışa çıxarılıb.

"Mardan Palace Hotel" və 6 lüks villadan (villalardan birində özü qalır) ibarət 104 719 kvadrat metr ərazinin sahibi olan AST İnşaat Turizm Sənaye və Ticaret müəssisəsinin iki banka 176 milyon dollar krediti, 90 milyon dollar ipotekası olduğu deyilir. Firmanın digər borcları isə 53 milyon 946 min liradır.

İş adamının borcu olanların siyahısı belədir:
Türkiyə Halk Bankı - 100 milyon dollar, 50 milyon lira ipoteka
Türkiyə Garanti Bankı - 15 milyon dollar, 35 milyon dollar, 26 milyon dollar və 40 milyon liralıq ipoteka
Asya İnşaat firması - 3 milyon 26 bin lira
İstanbul Kozyatağı Vergi Dairəsi - 1 milyon 716 min 630 lira və 1 milyon 207 min lira Muratpaşa Sosial Təhlükəsizlik Qurumu - 13 milyon 668 bin lira, 1 milyon 100 min lira və 16 milyon 625 min 900 lira.
Güçlü İnşaat firması - 15 milyon 141 min 682 lira
"Serdes Factoring" firması - 1 milyon 463 min 516 lira.
Antalya Aksu Bələdiyyəsi - rəqəm bəlli deyil.

Otel ilk dəfə iyunun 3-də satışa çıxarılacaq. 650 milyon lira qiymət qoyulan otel və 69 milyon 750 min 650 liralıq villalar ilk cəhddə satılmasa ikinci satış iyunun 30-da olacaq.

Ən lüks otelin inşaatında qızıl, bahalı metallardan, kristallardan istifadə edilib. 7 mərtəbəli əsas binanın hər mərtəbəsində fərqli bir ölkənin mətbəxi təklif edilir. Oteldə 7500 kvadrat metrlik SPA mərkəz fəaliyyət göstərir.

Bura eyni anda 1200 nəfərə xidmət göstərə bilir, 4-ü prezident nömrəsi olmaqla 560 otağı, 11 restoran, 11 barı, iki böyük bal salonu ilə heyran edir.