Bakıda yeni qiymət “icadı” – ŞƏRTİ VAHİD

Dolların məzənnəsinin tez-tez dəyişməsi ölkədə idxalçıları da maraqlı üsullara əl atmağa vadar edib.

Bu barədə AzNews.info “Qafqazinfo.az”a istinadən xəbər verir.

Belə ki, sahibkarlar qiymətləri dolların kursu ilə ayaqlaşdırmaq üçün ŞV (şərti vahid) sistemindən istifadə etmək qərarına gəlib. Analoji hal daha çox marka və brend mağazaların yerləşdiyi “Port Baku Mall” ticarət mərkəzində müşahidə olunur.

Ölkədə yeganə ödəmə vasitəsinin milli valyuta - manat olduğunu nəzərə alsaq, qanunla bu hal qadağandır. Bu məqamda məsələylə bağlı Azad İstehlakçılar Birliyinin sədri Eyyub Hüseynovdan münasibət öyrənib.

Sədr bildirib ki, bu, birmənalı şəkildə istehlakçı hüquqlarının pozulmasıdır:

“Satışı dollarla həyata keçirən topdan və digər pərakəndə satış mərkəzləri Vergilər Nazirliyi tərəfindən cərimələnir. Bununla bağlı Nazirlər Kabinetinin 94 nömrəli qərarında göstərilir ki, malların üzərində məsul şəxsin imzası olan müvəfiq qiymət sənədi olmalıdır. Həmin sənddə qiymət mütləq milli valyuta ilə göstərilməlidir. Satışı dollardan asılı bir vəziyyətdə qoymaq olmaz”.