Nağdsız ödənişlərin həcmi artıb

Bu ilin sentyabr ayında Azərbaycanda POS-terminallar vasitəsilə 51 milyon manat həcmində 638 min nağdsız ödəniş əməliyyatı həyata keçirilib.

Oxu.Az xəbər verir ki, bu barədə “Report” Azərbaycan Mərkəzi Bankının (AMB) yaydığı hesabata istinadən bildirir.

Ötən ilin eyni ayı ilə müqayisədə ödənişlərin həcmində 50% artım, sayında isə əksinə 24% azalma müşahidə olunub. POS-terminallar vasitəsilə nağdsız ödənişlərin həcmi ötən ilin ilk 9 ayı ilə müqayisədə 23% artaraq 2016-cı ilin yanvar-sentyabr aylarında 362 milyon manata çatıb.

Bankomatlar vasitəsilə nağdsız ödənişlərin həcmi əvvəlki ilin eyni dövrü ilə müqayisədə 3,5% azalaraq sentyabrda 28 milyon manat, sayı isə 53% artaraq 81 min ədəd olub. Hesabata əsasən, cari ilin yanvar-sentyabr aylarında ATM-lər vasitəsilə nağdsız ödənişlərin həcmi 3% artaraq 240 milyon manat təşkil edib.

Beləliklə, ATM və POS-terminallar vasitəsilə yanvar-sentyabr aylarında cəmi nağdsız ödənişlərin həcmi ötən ilin eyni dövrünə nisbətən 14,2% artaraq 602 milyon manata çatıb.