Bəzi banklar dollar satışını tamamilə dayandırıb

Kommersiya bankları mümkün qədər çox valyuta almaq üçün daha yüksək həcmdə tələb irəli sürürlər.

Azərbaycanda fəaliyyət göstərən bir sıra kommersiya bankları əhaliyə nağd dollar satışını bir qədər də məhdudlaşdırıb.

Oxu.Az xəbər verir ki, “Report”un analitik qrupu apardığı müşahidələr əsasında bildirir ki, cümə günü, avqustun 19-dan etibarən “YapıKredi Bank Azerbaijan” QSC, “Dəmirbank” ASC, “Amrahbank” ASC, “Bank of Baku” ASC dollar satışında adambaşına düşən limiti bir qədər də azaldıb. Bəzi kommersiya banklarında isə ümumiyyətlə, dollar satışı dayandırılıb.

Belə ki, “YapıKredi Bank Azerbaijan” adambaşına dollar satışının limitini 500-dən 200-ə, “Amrahbank”ın bəzi filialları 500-dən 300-ə, “Dəmirbank” 100-ə, “Bank of Baku” isə 500-dən 200-ə endirib. Xatırladaq ki, ən yüksək limitli dollar satışını “Azər-Türk Bank” ASC (500 dollar) həyata keçirir.

“Report”un analitik qrupu hesab edir ki, dollara olan tələbat SOFAZ-ın həftənin çərşənbə axşamı və cümə axşamı günləri mütəmadi olaraq həyata keçirdiyi valyuta hərraclarında satışa çıxartdığı valyutanın həcminin artırılması ilə səngiyə bilər:

“Qeyd edək ki, Neft Fondunun valyuta hərracında standart valyuta satışı 50 mln. dollar təşkil edir. Son valyuta hərraclarında isə dollara olan tələb 700 mln. dollarla maksimal rekord həddə yaxınlaşıb. Təbii ki, bu məbləğ həqiqi tələbi əks etdirmir. Kommersiya bankları mümkün qədər çox valyuta almaq üçün daha yüksək həcmdə tələb irəli sürürlər”.

Agentliyin analitikləri hesab edirlər ki, hazırda valyuta bazarında 250-300 mln. dollara real tələbat var: “Yəni, hərracda məbləğin artırılması nağd valyuta bazarını sakitləşdirə bilər.

Nağd valyutaya tələbin səbəbi isə idxal əməliyyatlarının aparılması və lisenziyası ləğv edilən banklardan Əmanətlərin Sığortalanması Fondu (ADİF) vasitəsilə ödənilən manat vəsaitlərinin dollara çevrilməsi prosesi ilə bağlıdır.

“Report”un analitik qrupu qarşıdakı hərracların birində valyuta təklifinin 300 mln. dollara qədər artırılaraq nağd valyuta bazarında yaranan qıtlığın aradan qaldırılacağını proqnozlaşdırır:

“Nəticədə, hazırda kommersiya banklarında 1,6850 AZN/USD-yə satılan nağd dolların satış məzənnəsi 1,63-1,65 AZN/USD-yə qədər geriləyə bilər”.