“SOCAR Trading”in rəhbərindən neftin qiyməti ilə bağlı

“İranın qlobal neft bazarına qayıtması hələlik güc bölgüsünə ciddi təsir etməyib”.

Oxu.Az APA-a istinadən xəbər verir ki, bu barədə “SOCAR Trading” şirkətinin rəhbəri Arzu Əzimov “Bloomberg” agentliyinə müsahibəsində deyib.

Onun sözlərinə görə, qonşu ölkənin bazara qayıdışından qorxanlar vəziyyəti şişirdir:

“Logistik çətinliklər səbəbilə İranın Avropa bazarında payı olduqca azdır. İran hələlik “SuMed” borusuna (Bu boru vasitəsilə Yaxın Şərqdəki şirkətlər Aralıq dənizinə iri həcmdə neft ixrac edə bilir) çıxışını bərpa edə bilmir”, - deyə o bildirib.

Neftin qiymətləri ilə bağlı proqnoz verən A.Əzimov deyib ki, cari ilin sonunadək “qara qızıl”ın 1 barelinin qiymətinin 40 dollardan aşağı düşəcəyinə inanmır:

“Çünki qiymət bu həddə düşsə, ABŞ-da buruqlar bağlanacaq, beləliklə, təklif azalacaq”.