Neft yeniden ucuzlaşdı

“Intercontinental Exchange” birjasında Brent markalı neftin bir barrelinin qiyməti təxminən 3 dollar azalıb. Günün əvvəlində qeydə alınan qiymət 46 ABŞ dolları olsa da, sonradan azalaraq 43,60 dollara çevrilib. Ucuzlaşmaya səbəb kimi Kanada və Səudiyyə Ərəbistanının ixracı və dolların möhkəmlənməsi göstərilib.

ANS PRESS “Financial Times” qəzetinə istinadla verdiyi məlumata görə, neft bazarındakı dəyişkənlik yatırımcılardan asılıdır. Yatırımcılar isə qeyri-müəyyənliklə üz-üzə qalıb. Onların bir qismi düşünür ki, Kanada yanğınları qiymətlərə güclü təsir edəcək. Digər yatırımcıların fikrinə görə Səudiyyə Ərəbistanının enerji sektorunda rəhbərliyin dəyişməsi dolların mövqeyini gücləndirəcək.


Kanadanın ixracı 1 milyon barrel azalıb. Nəticədə WTI markalı neftin qiyməti Brent markalı neftin qiymətinə bərabər olub. Yalnız gün ərzində xəbər yayıldı ki, yanğınlar getdikcə neft əldə edilən ərazilərdən uzaqlaşıb. Bir neçə gün əvvəl başlayan və Alberta əyalətini cənginə alan yanğınlar ötən həftə boyu neftin qiymətinə güclü təsir edib.


Səudiyyə Ərəbistanında Energetika Nazirliyinin yeni rəhbərliyi neft hasilatının rekord həddə çatdırılacağını bildirib. Bu da “qara qızıl”ın qiymətinə təsirsiz ötüşməyib.