2015-ci ildə 20-dən çox dövlət standartı yaradılıb

Cari il ərzində 23 yeni standart dövlət qeydiyyatına alınıb.

Bu barədə Standartlaşdırma, Metrologiya və Patent üzrə Dövlət Komitəsindən Oxu.Az-a bildirilib.

Komitədən bildirilib ki, bunların sırasında “İctimai iaşə xidmətləri və əhaliyə realizasiya olunan kulinariya məhsulları”, “Alkoqolsuz tonuslandırıcı ickilər”, “Profillənmiş fibrosement lövhələr və fitinqlər”, “Məhsulun spesifikasiyası və sınaq metodları”, “Məişət xidmətləri. Kimyəvi Təmizləmə”, “Güc trannsfarmatorları” və s.ləri yer alır.

“İqtisadiyyatın inkişafında standartlaşdırmanın rolu ildən ilə artmaqdadır. Standartlaşdırmanın əsas məqsədləri istehsalın effektivliyinin artırılması, istehlakçılara çatdırılan mal, məhsul və xidmətlərin keyfiyyətinin yüksəldilməsi, insan sağlamlığının qorunması istiqamətində təhlükəsizlik normalarının daha da təkmilləşdirilməsi, ətraf mühitin qorunması, Ümumdünya Ticarət Təşkilatına üzvlük çərçivəsində tələblərdən biri olan Ticarətdə Texniki Maneələrin aradan qaldırılmasına yardımçı olan standartların yaradılması və s.dən ibarətdir”-deyə, komitədən qeyd edilib.

Onu da əlavə edək ki, bu gün Beynəlxalq Standartlaşdırma Günüdür.