“Aşıq Şəmşir Mədəniyyət Ocağı” İctimai Birliyi silsilə tədbirləri davam etdirir

AzNews.info xəbər verir ki, Mədəniyyət və Turizm Nazirliyinin maliyyələşdirdiyi “Qədim xalq oyun tamaşalarının bərpası və müasir el mərasimlərində yenidən canlandırılması” layihəsi çərçivəsində “Aşıq Şəmşir Mədəniyyət Ocağı” İctimai Birliyi silsilə tədbirləri davam etdirir.

Layihə çərçivəsində növbəti tədbir Yevlax şəhərində yerləşən 30 saylı Kəlbəcər tam orta məktəbində baş tutub. Mərasimdə təhsil və mədəniyyət işçiləri, media nümayəndələri, məktəblilər iştirak edib. Giriş sözü ilə çıxış edən 30 saylı Kəlbəcər tam orta məktəbin direktoru Zahid Kazımov qonaqları salamlayıb və müasirləşən dünyamızda qədim və tarixi dəyərlərimizin unudulmaması istiqamətində aparılan işləri yüksək qiymətləndirib. Sonra isə söz mədəniyyət işçisi, filoloq Saday Musayevə verilib. O, milli-mənəvi dəyərlərin, o cümlədən xalq oyunları ənənələrinin qorunub saxlanmasını iftixar hissi ilə vurğulayıb. Qeyd olunub ki, xalq oyunları insanların həyatının müxtəlif cəhətlərini, eləcə də müxtəlif mərasimləri əks etdirən qədim folklor janrından biridir. Natiqin sözlərinə görə, məişət problemlərimizdən bəhs edən və böyük tərbiyəvi xarakter daşıyan folklorumuzun qiymətsiz nümunələri olan “Maraloyunu” və “Kilimarası” kimi oyun tamaşalar bu gün məhv olmaq təhlükəsi ilə üz-üzə qalıb. Bunun əsas səbəbi bu mədəni dəyərimizin əsasən Qarabağda, Kəlbəcər və digər işğal olunmuş rayonlarımızda qorunması, indi isə o yerlərin ermənilər tərəfindən işğalı nəticəsində o sənəti yaşadanların bir-birindən ayrı düşməsidir. Bu oyunlar isə ötən əsrdə toylarımızın, el şənliklərimizin əsas bəzəyinə çevrilib və hər məclisdə oynanılmışdır. Ailənin möhkəm təməllər üzərində qurulmasını insanlara aşılayan bu oyunların hazırkı dövrdə cəmiyyətdə təbliğinə böyük ehtiyac yaranmışdır”. Daha sonra isə tanınmış telejurnalist, yeni fəaliyyətə başlayan ”Qurtuluş” Televiziyasının Regional direktoru İnqilab Şirinov çıxış edərək xalq oyunlarının mayasında yüksək əhval-ruhiyyə, fiziki hərəkət, ruhi saflıq, zehni güc və sağlamlıq kimi müsbət keyfiyyətlərin dayandığını bildirmişdir. Dildən-dilə, eldən-elə keçən “Çövkən”, “Cilingağac”, “Topaldıqaç”, “Motal-motal”, “Əl üstə kimin əli”, “Bənövşə”, “Gizlən-qaç”, “Gözbağlıca”, “Fincan-fincan”, “Papaqatdı” və digər xalq oyunları uşaq və gənclər tərəfindən bu gün də həvəslə oynanılır. Təəssüf ki, bu xalq oyunlarının bəziləri artıq unudulur, uşaq və gənclər belə oyunlara çox az maraq göstərirlər. Məhz bütün bunları nəzərə alaraq, “Aşıq Şəmşir Mədəniyyət Ocağı” İctimai Birliyinin həyata keçirdiyi bu kimi layihələr təqdirəlayiqdir və hər kəsə örnək olmalıdır, deyə telejurnalist qeyd edib.

Çıxışların ardından hər kəsin maraqla gözlədiyi “Maraloyunu” nümayiş olunub. Kəlbəcərli aşıqların ifasındakı milli musiqinin sədaları altında göstərilən bu xalq oyunu özünəməxsus çalarları ilə diqqət çəkib.