Baş Prokurorluq təkzib etdi

Bəzi kütləvi informasiya vasitələrində 2013-cü il avqustun 30-da paytaxtın Xətai rayonu ərazisində Maksudov Ceyhun Elşən oğlunun qəsdən öldürülməsi faktına görə başlanmış cinayət işi üzrə istintaqın guya qeyri-obyektiv aparılması, eləcə də təqsirli şəxsin məsuliyyətə cəlb olunmamasına dair informasiyalar dərc edilib. Həmin informasiyalar həqiqəti əks etdirmədiyindən Baş Prokurorluq tərəfindən qəti şəkildə təkzib olunur.

Prokurorluğun mətbuat xidmətindən ANS PRESS-ə verilən məlumata görə, həmin informasiyaların heç bir əsası yoxdur.

Göstərilənlərlə bağlı bildirilib ki, C.Maksudovun deşilmiş-kəsilmiş bədən xəsarəti ilə xəstəxanaya daxil olması faktına görə həmin tarixdə Xətai RPİ-nin İstintaq Şöbəsində Cinayət Məcəlləsinin 126.1-ci (Qəsdən sağlamlığa ağır zərər vurma) maddəsi ilə cinayət işi başlanıb. C.Maksudov 01 sentyabr 2013-cü il tarixdə aldığı xəsarətdən xəstəxanada öldüyündən cinayət işi Cinayət Məcəlləsinin 120.1-ci (Qəsdən adam öldürmə) maddəsinə tövsif edilərək ibtidai istintaq Xətai rayon prokurorluğunda davam etdirilib.

Aparılmış istintaqla müəyyən edilib ki, Kinyazlı Kinyaz Böyükağa oğlu avqustun 30-da saat 22 radəldərində Bakı Metropoliteninin Xətai stansiyasının yaxınlığında aralarında yaranmış münaqişə zəminində C.Maqsudova bıçaqla xəsarət yetirib. Cinayətin aləti olan bıçağı saxlamaq üçün qohumu Yusif Kamil oğlu Məhərrəmova verib.

İstintaqın gedişində Y.Məhərrəmov ifadələrində C.Maqsudovun guya onun tərəfindən öldürüldüyünü bildirsə də, iş üzrə toplanmış təkzibolunmaz sübutlarla onun qeyri səmimi ifadələr verdiyi müəyyən edilib.

Cinayət işi üzrə K.Kinyazlıya Cinayət Məcəlləsinin 120.2.2 (Xuliqanlıq niyyəti ilə qəsdən adam öldürmə) və 228.4-cü (Qanunsuz olaraq soyuq silahı əldə etmə, gəzdirmə) maddələri, Y.Məhərrəmova isə həmin Məcəllənin 228.4-cü (Qanunsuz olaraq soyuq silahı əldə etmə, gəzdirmə) maddəsi ilə ittiham elan edilib.

Təqsirləndirilən şəxslər K.Kinyazlı və Y.Məhərrəmovun təqsiri şahid ifadələri, ekspertiza rəyləri və iş üzrə toplanmış digər dəlillərlə sübuta yetirilib. Cinayət işi üzrə istintaq tamamlanaraq 27 iyul 2014-cü il tarixdə baxılması üçün aidiyyəti üzrə Bakı Ağır Cinayətlər Məhkəməsinə göndərilib.