“Nina” avtobusda narkotik tapdı

Biləsuvar Gömrük İdarəsinin “Qoşa Təpə” gömrük postunda İran İslam Respublikasından Azərbaycan Respublikasına gələn İİR vətəndaşının idarə etdiyi sərnişin avtobusuna “Nina” ləqəbli kinoloji xidmət itinin tətbiqi ilə baxış keçirilib.

Dövlət Gömrük Komitəsinin mətbuat xidmətindən Oxu.Az-a verilən məlumata görə, yoxlama zamanı 13-14 nömrəli oturacaqların arasından gömrük nəzarətindən gizlədilən, üzərində heç bir yazı olmayan 1 ədəd plastik qabda 100 ml həcmində metadon (narkotik maddə) məhlulu aşkar olunub.

Yoxlama zamanı avtobusun sərnişini olan digər İran İslam Respublikası vətəndaşının əl çantasından isə 56 ədəd həbdən “Diazepam” (psixatrop maddə), 229 ədəd həbdən ibarət “Klonazepam” (psixatrop maddə) adlı dərman preparatları aşkar edilərək götürülüb.

Qeyd edək ki, 100 ml məhlulda metadonun quru maddəsinin ümumi miqdarı 0,1 qram, 56 ədəd həbdə diazepamın təsiredici maddəsinin ümumi miqdarı 0,112 qram, 229 ədəd həbdə klonazepamın təsiredici maddəsinin ümumi miqdarı 0,458 qram təşkil edir.

Faktla bağlı araşdırma aparılır.