Bakı-2015: Qadın güləşçilərimiz mübarizəyə başladılar – YENİLƏNİB

Azərbaycanın daha iki qadın güləşçisi bu gün Avropa Oyunlarında mübarizəyə qoşulub.

Oxu.Az xəbər verir ki, ilk olaraq xalı üzərində idmançımız Anjela Doroqan çıxıb.

O, ilk döyüşdə türkiyəli Merve Kengerə 8:2 hesabı ilə qalib gəlib.

1/4 finalda təmsilçimiz macar Mersedes Denislə üz-üzə gələcək.

Digər güləşçimiz Gözəl Zutova isə uğursuz çıxış edib. Ukraynalı Oksana Vaşçukla qarşılaşan Gözəl 2:4 hesabı ilə məğlub olub.

10:40

Azərbaycanın 58 kq çəki kateqoriyasında çıxış edən qadın güləşçisi İrina Netraba Avropa Oyunlarında güləş yarışında növbəti mərhələyə yüksəlib.

Oxu.Az xəbər verir ki, 1/8 mərhələdə başlayan Netreba Avropa çempionatının finalçısı Karola Raynero ilə üz-üzə gəlib.

İdmançımız 8:4 hesabı ilə qalib gəlib və 1/4 finala yüksəlib.

Yığmamızın digər üzvü Elmira Qəmbərova birinci görüşünü Henna Yohanssona (İsveç) qarşı keçirib.

21 yaşlı idmançımız startdaca məğlubiyyətə üzülüb. 4:0 hesabı ilə qalib gələn Yohansson finala yüksələrsə, Qəmbərova təsəlliverici görüşlərə qatılacaq.

10:15

Avropa Oyunlarının 5-ci günündə qadınlar arasında sərbəst güləş üzrə yarışlar davam edir.

Oxu.Az xəbər verir ki, qarşılaşmalar Heydər Əliyev adına İdman Arenasında keçirilir.

Xanımlar bu gün 53, 58, 63, 75 kq çəki dərəcələrində yarışacaqlar.

İlk olaraq Anjela Doroqan, daha sonra 58 kq çəki dərəcəsində Azərbaycan adına İrina Netreba, 63 kq çəki dərəcəsində güləşçimiz Elmira Qəmbərova, 75 kq çəki dərəcəsindəki idmançımız Gözəl Zutova yarışacaq.