“Azərbaycan üzərində qələbə qazansaq…” - Rangelov

AÇ-2016-nın seçmə mərhələsi çərçivəsində sabah millimizi qəbul edəcək Bolqarıstan yığmasının hücumçusu Dimitar Rangelov yerli məbuata açıqlama verib.

“Qafqazinfo” xəbər verir ki, son oyunda Xorvatiyaya 0:3 hesabı ilə uduzan bolqarların qol ümidi komandadan narazılıq edib. Rangelov yaxşı nəticə üçün heyətdəki futbolçuların öz komandalarında daim meydana çıxmalı olduqlarını bildirib: “Son bir neçə oyunda yaxşı oynamaq üçün əlimizdən gələni edirik. Lakin nəticə üçün millidə çıxış edən futbolçular öz klublarında müntəzəm oynamalıdır. Avropada yaxşı çıxış üçün təcrübə lazımdır. Xorvatiya ilə matçda qol vurmaq üçün şanslarımız oldu. Amma onlardan istifadə edə bilmədik. Üstəlik matçda da erkən qol buraxdıqdan sonra dönüş yaratmaq çətin idi”.

Forvard indidən DÇ-2018-in seçmə mərhələ oyunlarına hazırlaşmalı olduqlarını qeyd edib: “Xorvatiya ilə oyundakı nəticə çox pis idi. Amma bunu sığortalamaq üçün bir oyunumuz var. Azərbaycan üzərində qələbə qazansaq, növbəti seçmə mərhələ haqqında xoş düşünmək olar. Ona görə də sonuncu görüşdəki 3 xal çox vacibdir”.