Rusiya basketbolçularını mükafatsız qoydular

Rusiya Basketbol Federasiyasının bank hesabından Bakıda Avropa Oyunlarındakı qələbəyə görə verilmiş pul mükafatı yox olub.

Oxu.Az xəbər verir ki, basketbolun 3x3 növündə Rusiya yığmasının baş meneceri Aleksey Savrasenko “Sovetskiy sport” nəşrinə bildirib ki, vəsaiti hesabdan RFB-nin keçmiş prezidenti Yuliya Anikeyeva çıxarıb.

“Bu pullar avqustun 20-də RBF-in hesabına köçürülüb, lakin avqustun 25-də hesabdan bütün vəsait çıxarılıb. Oyunçulara heç bir qəpik də çatmayıb”, - Savrasenko deyib.

Baş menecer “Sovetskiy sport” nəşrinə komandanın hesabına bir milyon rubldan artıq vəsaitin köçürülməsi haqda sənədlərin sürətini təqdim edib. Savrasenkonun sözlərinə görə, Anikeyeva zənglərə və məktublara cavab vermir.

“Yaxın vaxtlarda mən RBF-in yeni prezidenti Andrey Kirilenko ilə görüşəcəm, və yığmanın “necə və kimin günahından” mükafatdan məhrum olmasından danışacam”.

Xatırladaq ki, Rusiya yığması Bakı-2015 ilk Avropa Oyunlarında basketbolun 3X3 növündə qızıl medalların sahibi olublar.

Yarışlar Azərbaycanın paytaxtında 12-28 iyun tarixlərində keçirilib.