Birinci Avropa Oyunlarına həsr edilən “Şəhər və insanlar” adlı sərgi

İyunun 26-sı “Art Villa” qalereyasında Əməkdar-rəssam Əşrəf Heybətovun Bakıda keçirilən Birinci Avropa Oyunlarına həsr edilən “Şəhər və insanlar” adlı sərgisi açılacaq.

AzNews.info xəbər verir ki, sərgi Azərbaycan İncəsənət Konsulluğu (Arts Council Azerbaijan) qeyri-hökumət təşkilatının təşəbbüsü ilə və “Simurg” Azərbaycan Mədəniyyət Assosiasiyasının dəstəyi ilə təşkil olunub.

Hal-hazırda rəssam Almaniyada yaşayır. O, 1991-ci ildən YUNESKO Rəssamlar Federasiyasının üzvü, Avropada Azərbaycan Mədəni Xadimləri Assosiasiyasının sədri, Beynəlxalq “Sülh səfiri”, Azərbaycan Rəssamlar İttifaqının fəxri üzvü, “Dünya xalqları incəsənəti” Beynəlxalq Assosiasiyasının mükafatı laureatıdır. Bundan başqa, Rusiya Federasiyası Rəssamlar İttifaqının və Rusiya Şərqşünaslıq Cəmiyyətinin üzvüdür. “Azərbaycan-Almaniya” Dostluq Cəmiyyəti İdarə Heyətində təmsil olunur. Çingiz Aytmatov adına Beynəlxalq Fondun Avropa ölkələri üzrə Kuratoru, Almaniya Rəssamlar Birliyi, Beynəlxalq PDA (“Platforma, Dialoq, Avrasiya”) təşkilatının, Qərbi Avropa Elm və Mədəniyyət Akademiyasının üzvüdür.

Sərgidə rəssamın 25 rəngkarlıq əsərləri nümayiş olunacaq. Sərgiyə giriş sərbəstdir.