Smayliklərdən bank parolu hazırlandı

Britaniyalı alimlər smayliklər vasitəsilə tərtib olunan parolun köməyi ilə bank hesablarına girişə imkan verən mobil proqram yaradıb.

ANS PRESS-in məlumatına görə, Britaniyanın Intelligent Environments şirkəti onlayn-banka giriş üçün smayliklər ardıcıllığından parol kimi istifadəyə imkan verən texnologiya hazırlayıb. Bu barədə ICTnews xəbər verir. Yeni texnologiya 480 dəfə çox parol variasiyaları təklif edir.

Müəlliflər iddia edir ki, smayliklərdən istifadə parolların yoxlanması prosesini bir neçə dəfə çətinləşdirməyə imkan verir. Məsələn, əgər 4 rəqəmli parol 7290 müxtəlif rəqəmlər ardıcıllığından ibarətdirsə, o zaman 40 smaylik növündən tərtib olunan 4 rəqəmli parol 3498308 ardıcıllıqdan ibarətdir, yəni 480 dəfə çox.

Intelligent Environments şirkətindən bildirilib ki, bu halda smaylikləri tapmaq daha çətindir, çünki onlar doğum tarixi və ya hər hansı ildönümü ilə bağlı təyin edilmir.