Moskvada I Avropa Oyunlarına həsr olunan flaşmob keçirildi – FOTO

Moskvada Rusiya Azərbaycanlı Gənclər Birliyinin (RAGB) sədri Leyla Əliyevanın təşəbbüsü ilə Bakıda keçiriləcək I Avropa Oyunlarına həsr olunan flaşmob keçirilib.

AzNews.info xəbər verir ki, APA-nın Moskva müxbirinin verdiyi məlumata görə, flaşmob paytaxtın M.Qorki adına Mərkəzi Mədəniyyətlər Parkında baş tutub.

RAGB fəalları suvenir və xatirə hədiyyələrini, şar, qolbağ, üzərində “Bakı-2015” loqotipi olan gödəkcə, qələm və broşürları parkda istirahət edən paytaxt sakinlərinə paylayıblar. Onlar moskvalılara Bakıda tikilən olimpiya obyektləri, bütün Azərbaycanı diyar-diyar gəzən Avropa Oyunları məşəli haqqında məlumat veriblər.

RAGB İdarə Heyətinin üzvü Emin Hacıyev bildirib ki, Leyla Əliyevanın rəhbərlik etdiyi Rusiya Azərbaycanlı Gənclər Birliyinin fəalları Bakıda keçiriləcək möhtəşəm idman bayramının təbliği istiqamətində bu günə kimi bir sıra tədbirlər həyata keçirib:

“Leyla Əliyevanın təşəbbüsü ilə “Bakı-2015”-ə həsr olunan Universiyada təşkil etdik. Moskvanın nüfuzlu ali məktəblərinin tələbələri bu universyiadada iştirak etdilər. Bu gün keçirilən flaşmob da “Bakı-2015”-ə dəstək layihəsi çərçivəsində baş tutub”.