Kiyevdə güclü partlayış: Bankın binasını minaatandan atəşə tutdular

Ukraynanın paytaxtında gecə naməlum kişi bankın binasını minaatandan atəşə tutub.

Oxu.Az-ın məlumatına görə, bu barədə “112 Ukrayna” telekanalı hadisə yerində olan jurnalistin sözlərinə istinadən xəbər verib.

Beləliklə, dünən gecə Kiyevin mərkəzində Şevçensk rayonunda “Ukrinbank”ın binasına “Tavriya” markalı avtomobil yaxınlaşıb, maşından naməlum qara geyimli kişi düşüb.

Məlumata müvafiq olaraq kişi bankın 4-cü mərtəbəsinin pəncərələrinə minaatandan atəş açıb, sonra isə hadisə yerindən qaçıb.

Partlayış yerinə hüquq-mühafizə orqanlarının maşını gəlib.

Xəsarət alanlar və dəyən zərər haqqında hələlik heç bir məlumat yoxdur.