Tiflisdə ölənlərin sayı 17-yə çatdı

Tiflisdə güclü daşqın nəticəsində ölənlərin sayı 17-yə çatıb, beş nəfər isə itkin düşüb.

Oxu.Az Gürcüstan KİV-nə istinadla xəbər verir ki, bu barədə bu gün daxili işlər naziri Vaxtanq Qomelauri bildirib.

“17 nəfər ölü tapılıb, beş nəfər axtarılır”, - deyən Qomelauri qeyd edib ki, iki nəfərin cəsədi Vake rayonunda “Mziuri” parkında tapılıb.

Xatırladaq ki, Tiflisdə güclü daşqın iyunun 14-nə keçən gecə baş verib. Nəticədə zoopark, Tamaz Elizbaraşvilinin itlər üçün sığınacağı, yaşayış evləri, şəhərin mərkəzi yolları su altında qalıb, infrastruktur dağılıb.