Bakı bulvarının ona oxşamayan “əkiz qardaşı”... – FOTO

İdmanla məşğul olmaq istəyənlər üçün trenajorlar, tez-tez tozu silinən tərtəmiz skamyalar, uşaqlar üçün saysız-hesabsız oyun meydançaları...

Bunlar Bakıdakı parklarda görməyə alışmadığımız mənzərədir. “Bakı Ağ şəhər” layihəsi çərçivəsində salınmış Bakı Ağ Şəhər Bulvarı isə sakinləri bu qeyri-adi mənzərəyə öyrəşdirəcək.

Əslində köhnə bulvarın qurtardığı yerdən başlayan və onun “əkiz qardaşı” da adlandıra biləcəyimiz Ağ Şəhər Bulvarının uzunluğu 2,7 kilometr, sahəsi 33 hektardır. Burada futbol, voleybol, basketbol oyunları üçün xüsusi meydança və bu oyunları izləmək üçün hətta tamaşaçı yerləri də quraşdırılıb.

Bulvarda yeni əkilmiş ağaclar az olmasa da boş qalan sahələr də kifayət qədər çoxdur. Daha çox yaşıllıq daha çox sərinlik və təmiz hava deməkdir...

Bulvarın sakit havasını sözün hər iki mənasında pozan isə dəniz kənarındakı çirkab sulardır. Dənizin neft tullantısı ilə örtülən suyundan gələn qoxu Xəzərə baxıb sakitləşmək həvəsini alt-üst edir.

Bakı bulvarının digər hissəsində, necə deyərlər, “köhnə bulvar”da kifayət qədər çayxana, kafe-restoran, ticarət köşkü olduğu halda Ağ Şəhər Bulvarında heç biri gözə dəymir. Yalnız bir köşk var. Orada da yalnız su satılır. Əvəzində isə burada velosiped sürmək, idman etmək üçün kifayət qədər geniş meydança var. Ona görə də bura daha çox idman həvəskarları gəlir.

Virtualaz.org saytının reportyor qrupu Bakı Ağ Şəhər Bulvarında gördüklərini fotoobyektivə həkk edib. Həmin fotoreportajı təqdim edirik: