Bakıda bağlanan yollar bu tarixdə açılacaq

Formula-1 üzrə Azərbaycan Qran-Prisi ilə əlaqədar nəqliyyatın hərəkəti üçün bağlanan küçələrin nə vaxt açılacağı məlum olub.

Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Vaqif Əsədov Oxu.Az-a bildirib ki, tətbiq edilmiş qrafikə əsasən, 27 iyun, səhər saatlarından etibarən nəqliyyatın hərəkətinin məhdudlaşdırıldığı küçələrdə avtomaşınların sərbəst hərəkəti bərpa olunacaq. Belə ki, tətbiq edilən məhdudiyyətlər aradan qaldırılacaq.

V. Əsədov bir daha xatırladıb ki, Formula-1 yarışları Azadlıq meydanından başlayaraq Puşkin, Xaqani, Bülbül küçələri, Zərifə Əliyeva prospekti, Rəsul Rza küçəsi, Neftçilər prospekti, Əziz Əliyev küçəsi, Qoşa Qala qapısı-Gənclər meydanı, İstiqlaliyyət küçəsi, Niyazi küçəsi, Azneft meydanı, Neftçilər prospekti ilə eyni marşrut üzrə nəzərdə tutulduğundan bu istiqamət üzrə avtomobillərin istifadəsinə məhdudiyyət qoyulub.

Şöbənin rəisi həmçinin qeyd edib ki, Bakı-Salyan yolunun 14-cü km-dən, Su Hövzəsi Kompleksindən, Xaqani və Üzeyir Hacıbəyov küçələrinin Rixard Zorge küçəsindən Səməd Vurğun küçəsinədək olan hissələri, Zərifə Əliyeva prospektinin Yusif Məmmədəliyev küçəsinədək olan hissəsi, Rəşid Behbudov küçəsinin Neftçilər prospektindən Nizami küçəsinədək olan hissəsi, Səməd Vurğun küçəsinin Neftçilər prospektindən üzü Üzeyir Hacıbəyov küçəsinədək olan hissəsi, habelə Bülbül prospektinin Neftçilər prospekti ilə Lev Tolstoy küçələri arasındakı hissəsi bu gündən nəqliyyatın hərəkəti üçün bağlıdır.

Cənub tərəfdən paytaxtın mərkəzinə hərəkət etmək istəyən sürücülərə Bakı-Salyan yolunun 14-cü km-dən 3-cü kənar dairəvi yolla Yasamal rayonundan şəhər istiqamətə hərəkət etmələri tövsiyə edilir.

V. Əsədov bildirib ki, yarışların keçirildiyi ərazi 3 zonaya bölünüb. Həmin zonalarda yaşayan şəxslərin avtomobillərinə xüsusi buraxılış və fərqlənmə nişanları veriləcək.