“Facebook” videoları üçün yeni funksiya tətbiq olunacaq

“Facebook” şirkətinin istehsal şöbəsinin rəhbəri Kris Koks “WSJDLive” konfransında sosial şəbəkə üçün yeni unikal filtri təqdim edib.

Oxu.Az xəbər verir ki, İKT.lent.az-ın “vladtime.ru” saytına istinadən məlumatına görə, filtrin köməyi ilə istifadəçilər videonu əsl sənət əsərinə çevirə biləcəklər.

“Facebook” əməkdaşı bu günlərdə ABŞ-ın Kaliforniya ştatının Laquna-Biç şəhərində keçirilmiş “WSJDLive” konfransında filtrin fəaliyyətini tədbir iştirakçılarına əyani nümayiş etdirib. Real vaxt rejimində K.Koks videoya çəkdiyi tədbir iştirakçılarını gözəl bir təsvirə çevirib.

“Facebook” mütəxəssisi bildirib ki, yaxın vaxtlarda yeni funksiya ilə “Facebook live videos” xidmətinin bütün istifadəçiləri istifadə edə biləcəklər. Ancaq o, yeniliyin tətbiq olunacağı tarixi açıqlamayıb.

K.Koks qeyd edib ki, şirkət mütəmadi olaraq müştərilər üçün faydalı və maraqlı olacaq yeni proqramların tərtibatı ilə məşğuldur.