"Şahdağın hədiyyəsi" – VİDEO+FOTO

Xəbər verdiyimiz kimi, Mədəniyyət və Turizm Nazirliyinin tabeliyində olan “Şahdağ” Turizm Mərkəzində 20 avqust 2016-cı il tarixində “açıq qapılar günü” layihəsi çərçivəsində “Şahdağın hədiyyəsi" adlı xüsusi əyləncəli konsert proqramı təşkil olundu.

AzNews.info-ya mərkəzdən verilən məlumata görə, kampaniyanın əsas məqsədi orta statistik bir vətəndaşın öz həftəsonunu səmərəli və maraqlı keçirə bilməsi üçün şərait yaratmaq idi. Belə ki, cəmi 5 manata Bakıdan-Qusara təşkil edilmiş xüsusi avtobuslarla Şahdağ Turizm Mərkəzinə gedə və daha 5 manat ödəməklə istənilən əyləncə növündən 3-ünü seçərək əylənmək mümkün idi. Şahdağ Turizm Kompleksi bu tədbiri təşkil edərək, nəinki qış, eləcə də, yay fəslində Azərbaycanın və regionun əsas turizm destinasiyalarından biri kimi tanınmağa iddialı olduğunu turistlərə nümayiş etdirdi. Şahdağ öz qonaqlarını bir-birindən maraqlı əyləncə və şou proqramlarla sevindirdi. Eyni zamanda, mərkəz azyaşlı qonaqlarını da unutmamışdı. Uşaqlar üçün musiqi dərsləri, animatorların iştirakı ilə bir sıra maraqlı eksperimentlər və şou proqramlar təşkil olunmuşdu. Bob kart, ziplayn, trotinnet, kanat və bir sıra əyləncə məkanları qonaqların istifadəsinə verilmişdi.
Bundan başqa mərkəzdə at üstündə gəzinti, velosiped və kvadratsikl kirayəsi xidmətləri də təklif olunur.
Kampaniya günü mərkəzin aşpazları bir sıra masterklasslar təşkil edərək, qonaqların gözü önündə ləziz təamlar hazırladılar. Böyük marağa səbəb olmuş şokalad şəlaləsinin ətrafında isə, bu təamlardan təmənnasız dadmaq imkanı hamıya nəsib oldu. Gənc ifaçı Ləman Dadaşova isə, kiçik konsert proqramı ilə, bütün yerli və əcnəbi turistlərin zövqünü oxşamağı bacardı. Əyləncə dolu gün atəşfəşanlıqla sona çatdı.

Qeyd edək ki, yay mövsümünün başlanğıcı hesab olunan iyun ayından bu günədək Mədəniyyət və Turizm Nazirliyinin tabeliyində olan “Şahdağ” Turizm Mərkəzinə gələn turistlərin sayı 25 000-dən çox olmuşdur.

AzNews.info sözügedilən gündən geniş fotoreportajı oxucularına təqdim edir: