Azərbaycanda “yalançı polis” adam oğurladı

Azərbaycanda özünü polis əməkdaşı kimi təqdim etmiş şəxslər tutulublar.

Oxu.Az Daxili İşlər Nazirliyinin saytına istinadən xəbər verir ki, iyulun 26-da Novxanı kənd sakini Əli İsmayılov Abşeron Rayon Polis Idarəsinə (RPİ) müraciət edərək iyulun 24-də saat 03 radələrində Novxanı qəsəbəsində gözətçi işlədiyi evə gəlmiş, özünü Cəlilabad Rayon Polis Şöbəsinin əməkdaşı kimi təqdim edən Səid adlı şəxsin onun barəsində şikayət ərizəsi olduğunu bildirib və qəsəbənin ərazisindəki evlərdən birinə aparıb.

Ə.İsmayılov müraciətində yalançı polisin onu 1 gün saxlamasını, hədə-qorxu gəlib 5000 manat pul istəməsini, 3000 manat aldıqdan sonra buraxılmasını, lakin sonradan telefonuna zəng edib əlavə 2000 manat pul tələb etməsini bildirib.

Baş Cinayət Axtarışı İdarəsi və Abşeron RPİ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Cəlilabad rayon sakinləri, əvvəllər məhkum olunmuş Tural Səfərov, Atakişi Şahmarov və Seymur Qurbanov tutulublar.

Əməliyyat zamanı T.Səfərovdan 5,58 qram, S.Qurbanovdan isə 5,79 qram marixuana götürülüb.